ဇူလိုင် ၁၈၊၂၀၂၅
VOM
မန္တလေးမှာဖွင့်ထားတဲ့ ရာချီရှိတဲ့ KTV ခန်းတွေထဲက ၂၅ ခုဟာ သက်ဆိုင်ရာက သတ်မှတ်တဲ့ စည်းကမ်းတွေ မလိုက်နာတဲ့အတွက် မနေ့ ဇူလိုင် ၁၇ ကစပြီး တလ ယာယီပိတ်လိုက်တယ်လို့ အုပ်ချုပ်ရေးနဲ့ နီးစပ်သူတွေဆီကသိရပါတယ်။
မန္တလေးမြို့ခံ နှံ့စပ်သူတယောက်ပြောပြတာက” KTV ဆိုတာ ဘီယာသောက် သီချင်းဆို သီးသန့်မဟုတ်တော့ဘူး ဟိုင်းခန်းလို့ခေါ်တဲ့ မူးယစ်ဆေးသုံး တညလုံးမနားမနေကကြတဲ့ဟာတွေများလာတယ် ဒါ့ကြောင့် သက်ဆိုင်ရာက ပိတ်လိုက်တာလို့ ကြားရတယ်” လို့ပြောပါတယ်။
KTV ခန်းတချို့မှာ happy water လို့ခေါ်တဲ့ မူးယစ်ပျော်ရွှင်စေတတ်တဲ့ အရည်ဖျော်ဖို့အသင့်လုပ်ထားတဲ့ အမှုန့်တထုပ် ၆သိန်းလောက်ပေးရသလို Kလို့ခေါ်တဲ့ ရှူရှိုက်ရတဲ့ မူးယစ်ဆေး အမျိုးအစားလိုက် သိန်းဆယ်ချီပေးသုံးစွဲနေကြတယ်လို့ သိရပါတယ်။ ညလုံးပေါက် လူ ၃ယောက်လောက် ကခုန်ရင် အခန်းခ နဲ့ မူးယစ်ဆေးဖိုးပေါင်းရင် သိန်းရာချီကုန်တယ်လို့လည်း သွားဘူးသူတွေက ပြောပါတယ်။
ဟိုင်းခန်းသွားဘူးသူတယောက်ရှင်းပြတာက
“Hi ဖို့အတွက် ဘာလိုလဲ ဆိုတော့ E လို့ခေါ်တဲ့ အက်စတာစီ ဆိုတဲ့ မူးယစ်ဆေးအပြားရယ်။ K လို့ခေါ်တဲ့ ကက်တမင်းဆေးအမှုန့်ရယ်။ Happy Water လို့ခေါ်တဲ့အရည်ဖျော်ပြီးသောက်လို့ရတဲ့ ဘာမှန်းမသိတဲ့ Chemical အရည်တွေရယ်ပေါ့။ အဲဒီ E , K , Happy Water တစ်ခုမဟုတ် တစ်ခုသုံးပြီး Hi ကြရတာပါ။” လို့ ရှင်းပြထားပါတယ်။
ဒီလိုအခန်းတွေသွားပြီး သုံးစွဲကခုန်ကြတာ အစက လူနည်းစုဖြစ်ပေမယ့် ခုနောက်ပိုင်းမှာ လူငယ်တချို့ဟာ ညလုံးပေါက်သာမက ၂ရက် ၃ရက် အိမ်ပြန်မလာကြတာတွေ ၊ အိမ်ထောင်ရှင်တွေ အိမ်ထောင်ပျက် ဘဝပျက်ကြတာတွေ ရှိလာတယ်လို့လည်း သိရပါတယ်။
မန္တလေး အိမ်ရှင်မတယောက်ပြောပြတာက ” ရန်ကုန်၊ မန္တလေး၊ နေပြည်တော်မှာ အရင်က သိပ်မရှိဘူး နယ်စပ်တွေ စစ်ဖြစ်တော့ အဲဒီကယဥ်ကျေးမှုတွေ တည်ငြိမ်တဲ့နေရာကို ကူးစက်လာကြတာ။ မန္တလေးမှာဆို နေ့ခင်းကြောင်တောင် လုယက် သတ်ဖြတ်တာတွေပေါလာတာ ဒါတွေကြောင့်လည်းပါတယ်။ မူးယစ်ဆေးကတော့ ပပျောက်အောင် လုပ်သင့်ပါတယ်” လို့ ပြောပါတယ်။
သက်ဆိုင်ရာ မူးယစ်ပပျောက်ရေးတပ်ဖွဲ့နဲ့ တာဝန်ရှိသူတွေက KTV ခန်းတွေကို ရှောင်တခင်စစ်တာတွေရှိလာနေတယ်လို့ KTV လုပ်ငန်းရှင် အသိုင်းအဝိုင်းက သိရပါတယ်။
Photo- Crd to respectful owner
